moses wetangula oikore mar chung’ kende e laro kom ker kochopo 2022
Written by Phenny Waga on January 11, 2019
Gi Harvench Odiwuor
Jatend duond bura mar Ford Kenya ma en seneta ma Bungoma moluor Moses Wetangula owacho ni oikore mar chung’ kende e laro kom ker kochopo 2022.
Ka ne oloso gi od fwambo moro mathurka, migosi Wetangula nowacho ni duond bura mare no osesidhe ayanga kaka jafwadh bandera margi e yiero mabiro. E yiero mokalo, duond bura mar Ford Kenya neen achiel kuom duond buche manoloso riwruog siasa mar NASA ka sani to giikore mar chung’ kendgi kendo gin gi adieri mar yudo loch.
Kata kamano, moko kuom jotend duond burano moting’o jalup jakom Bonny Khalwale osenyiso ayanga ni giriwo lwedo jalup ker laktar William Ruto ka jalup jakom duond burano e bade ma Kisumu Felix Minda to ne jowacho ni jogo manosidho Wetangula kaka jafwadh bandera ne onge kod teko mar timo kamano kendo noseyo jatelono kuom dwoko duond burano chien.