Jagor e migap pur omaki..
Written by Rodgers Ogongo on August 30, 2018
Jagoro mar Migap Pur Dr Richard Lesiyampe/photo courtesy..
Wach mar mibadhi e weche bando pachoka chako kelo wich bar ne jotelo ma itudo kod chochni maneomako weche bando pachoka ndalo ma chien kocha.
Magi chako yangore tok meko mar jagoro e migap pur Laktar Richard Lesiyampe okinyi ma kawuono ni tok apis DPP lero ni gin kod neno moromo mar mako bura ne jatelono.
Bende apis DPP olero ni jotelo moko maromo 6 bende ichano maki kotemore gi wachno mar ne bedo gi lwedo e wach mar ne timo oledhi mag tudore kod jo ohala moko mar ne timo mibadhi mar kelo bando e pachoka kowuok oko eyore maok chik opuodho.
Jotelo go oting’o Newton Terer-director mar NCPB,Manager mar omenda Comel Kiprotich,Clerk Caroline Kipchoge,Renson Kibet Korir jatend dero mar cham Eldoret,Erick Kipketer Talum jaket records,to kod Joseph Kipruto Cheboi ma en jatend weche pur ei Uasin Gishu.
Iwacho ni Lesiyampe oyudore e orindi maliet tok ne puodho nyiepo mar bando kod omenda mane ok opuodhi mar timo chenrono.
Wachore ni NCPB ne onyiewo bando e loo duol mar Strategic Food Reserve Oversight Board kuom thuolo mar higni 2 kochakore bwe mar 10 e higa 2016.
Nonro yango ni NCPB ne otiyo gi omenda billion 11,365,879,918 e timo nyiepo ataro mar omenda mane opuodhi maromo billion 6.
Bende iwacho ni duol no mar NCPB ne otimo ohala kod jo ohala moko maok opuodhi mane okelo bando kowuok e piny Uganda,to ne gitamore kawo cha kowuok kuom jopur mapachoka kama omenda maloyo billion 2 ne otigodo marach.
