Nonro mar nek Sharon Otieno medo dhi nyime…
Written by Rodgers Ogongo on September 12, 2018
Zachary O.Obado-governor Migori County/photo courtesy
E tielo mokwongo,obila ne odayo dhoo gavana ma Migori Zachary Obado komakore gi nek mar Sharon Otieno mane onegi juma mokalo e lwasi makoch mowuoro.
Obado ne ochwal nyaka e log tich mar DCI bade ma Kisumu kama ne odae dhoge kuom seche buora kod obila go moyang kaka,Homicide mane owuok Nairobi.
Nonro ni itimo mar yango jogo mane onego Sharon mabende iwacho ni ne nigi tudruok mag weche hera kod gavana Obado.
Esechego,jafwambo Barrack Oduor to kod achich machielo Michael Oyamo bende ne ochopo kanyo komakore gi nonro no ma pod dhi nyime.
Magi ne otimore sama familia mar Sharon kokalo kuom okil margi Peter Kaluma ne owacho ni gionge kod chenro mar iko nyathigi no mapiyo ka gidwaro mondo adieri yudi kod jogo mane onege.
Wachore ni bende obila ne okawo chal remb Obado mar konyo timo nonro e wachno mabende pod medo yudo kwet buora kowuok kuom jotelo mag siasamapachoka.
