Jago moro ochwo wadgi gi pala Gem Siaya kagilaro miyo moro

Conceptual image of a sharp knife with blood on floor

Gi Odalo Fred

Jago moro majahigni 56 ochwi gi pala bowito ngimane gi nyawadgi e sub county ma Gem, Siaya County, ekinde manegiyware kagilaro miyo moro.

Masira makamaa otimore egweng’ mar Kanono mayudore Kanyadet Sub Location, kakoro ruoth ma South west Gem location migosi Paul Nyajure, owachoni weche mag hera olokore apilo malungo wang’ ekind ji ariyogo.

Kalure gi Ruoth Nyajure, Jago mowito ngimaneno mabende oyangi kaka Maurice Anyango Alwasi, noromo gi thoone ekinde ma jago machielo manyinge Ooko Samo majahigni 54, nochwoye gi pala e kore.

Bende omedo ni jogweng’ makono oyudo jogo kanie dhao mapek miwuoro ekinde manegiyware ewi miyo moro mokoyangi nyinge.

Ruoth Nyajure noyudo lipot makamaa kendo goyo sim mapiyo piyo ne jatend obila kata OCS e tesend obila ma Akala mabende nochopo kanyo to katakamano Alwasi nerik oseninde bade. Omedo ni ringre mosenindo osetere kar kano ringre mar Bondo Sub County Hospital Mortuary etimone bero makende.

Katakamano achich ewi nek makamaa to notomo ng’wech kendo ringo apoya nono tok fwenyo ni Alwasi osewito ngimane.