Paro medo pogore e wach gwelo mar kom senate Migori….
Written by Rodgers Ogongo on July 31, 2018
Paro medo pogore e wach gwelo mar kom senate Migori ma yande Odm ochiwoe otiko ma achiel ka chiel ne Moluor Ochilo Mbogo Ayako e dhi laro komneo e yiero ma ichano tim 8-10-2018.
Magi timore sama riwruok mar Ojende mag Mbalariany ne owacho ni giikore mar dhi mako bura e doho mar kwedo wachno kadipo ni Odm ok gi luongo gwelo machielo mar miyo jopiny thuolo mar timo welo makare ne jogo ma gidwaro.
Riwruogno ne owuok oko mar wacho ni ok gibiyie gi wach mar walo Moluor Ochilo kaka jago madhi chung’ kod otiko no mar Odm,kagiwacho ni demokrasia mar gi kaka jogo kura ne ok odew e kinde mane jodito mag Party ne okawo okang’ makamano.
Ne gilero ni dwaro mar jo Migori en ni mondo migi thuolo mar neno kaka gwelo ni idhi timo makare maok nyal kelo koko moro amora.
Nyaka sani weche buora osebedo kawuok e county no kamokore gi wachno ,kama nyaka governor makono Zachary Okoth Obado bende nyocha owuok oko mar kwedo wachno kowacho ni ok osiro paro mane Odm otiyogo e chiwo otiko ne Moluor Ayako,kata obed no Ayako yande ne oweyo bura mane omako kane okwedi go loch mar Obado e kom governor.
