Paro medo pogore e duol mar IEBC.

Jakom mar Iebc Wafula Chebukati kod jokanyo mamoko[Photo courtesy]

Paro mopogore medo wuok e duol mar yiero pachoka Iebc komakore gi wach mane jakom gi Wafula Chebukati oterogo pacho e yor adhuon jataa chenro margi Ezra Chiloba kotenore giwach mar chochni e omenda mag duol no.

Wachni omiyo pogruok omienjo e kind jokanyo mag Iebc,kakoro weche wachore ni moko kuom jokanyo siro pach jakom no sama moko to siro migosi Chiloba  e bedo e apis.

Wachore ni romo mane obedo chieng’ tich 5 juma mokalo e tend Chebukati,ema ne gikawe okong’ makano  kane pok Chebukati owuok pachoka kodhi Nigeria,wach makoro ni pogo jokanyo.

Pogruok ma kamano ineno sama commissioners Boya Molu kod Prof.Abdi Guliye siro parono kata obedo ni jalup jakom no Consolata Maina kod Dr Paul Kurgat to jo siro migosi Chiloba.

Ibiro paro ni kane pok jopiny odok e yiero mar 2 e kom Ker pachoka higa mokalo,mane en jakanyo e duol onogo Dr.Roselyne Akombe ne owacho ni pogruok ne thooth e kind jokanyo,wach mane ok nyal miyo yiero no ne nyalo timore e yoo makare.

Akombe ne ogwe tao e duolno kendo ringo nyaka piny America ne luoro mar ngimane.

Kane oyango wachno,Chiloba ne olero ni ne oyudo ote mar mbui[Mail]mane lero ne ni romono nyocha ong’ado mondo odhi e yueyo mar dweche 3 kotenore gi nonro ma itimo e yango adieri e wach pesa mane otigo e nyiewo gige yierono ma higa mokao.