Photo courtesy
Sunflower
Gi Odalo Fred,
Kambi mar Bidco gi Safaricom ochopo e winjruok gi sirkand county ma Migori mar konyo jopur makono epur mar sunflower gi soya beans.
Paro makamaa biromana kalure gi podho mar ohand niang’ kod ndawa masani osebedo katimo marach mokalo e county ma Migori kono, kalure gi nengo mamalo mag gige pur. Jatend migao mar pur e county onogo ma migori, Isca Oluoch, owacho ni jopur makono osebedo kasandore ewi gino maginyalo puro gi ekindeni, kalure gi ohala marach mar ndawa gi niang’ masani osepodho yokono.
Migori osegabedo kagolo atamalo maromo 70 mar ndawa e Kenya mangima e kinde mokalo, to katakamano gi ekindeni, kwan mar ndawa osebedo kadok piny matamre gi nono tok kambi maduong’ mar ndawa (Alliance One) wuok oko mar pachokaa.
Photo courtesy
Soya Beans
Jatend migao no omedo ni sunflower gi soya beans gin cham madhigolo ohala maber moloyo mano ma jopur nobedo kayudo e niang’ kod ndawa.
Olero ni odiochieng’ ma nyoro, apisas mag Bidco kod Safaricom nolimo gwenge makono kendo chiwo orak kata contract ne jopur maromo 750 e Suna West kod Nyatike sub counties. Kalure gi winjruok makamaa, Safricom osekawo pwodho mar Digi Farm kendo birochiwo manyiwa, pwonj mar pur, kodhi, kaachiel gi gik pur mopogore opogore mar neno ni pur mar sunflower gi soya beans otimo maber yokono. Magi gin ler mochiw gi apisa mar Safaricom ebade mar pur kat M-Agriculture mikai Elizabeth Mudogo.
Komachielo en ni Bidco birobedo kamanyo chiro makare mar mwandugo duto mar neno ni jopur oyudo omenda makare esama owinjore. Kalure gi jataa chenro mar kambi mar Bidco, migosi John Kariuki, winjruok makamaa dhinyaka chiwo okumba kata insurance ne jopur duto makono mar neno ni giyudo kony kinde ma cham gi omonj kod midhiero mopogore opogore kamoting’o oooro kata drought gi dho ombogo.
Achiel kwom jopur makono migosi Polycarp Ndege owacho ni singo mar chiwo chiro ne jopur en gino madhibero ngima jopur kaachiel kod jo Migorui duto.
Reader's opinions
