Photo courtesy. Court session.
Gi Odalo Fred Ouma
Kalure kod kwayo mayande ogolo kod director mar ofwamb kich kata Directorate of Criminal Investigations (DCI) mondo bad migepe moko kaachiel kod jotich mag bengi moko thurkaa mondo omaknegi bura kalure kod mibadhi mar omenda, jamin wach e doh mapachokaa kata Director of Public Prosecutions (DPP) Noordin Haji, ochwogo aput moro madhitimo apedha kod nonro e buge mag omenda e bengi abich madongo pachokaa kalure kod lal mar omenda maromo shillings billion 8 mar tije rowere kata National Youth Service (NYS
E andiko mare, migosi Haji owacho ni osechwogo aput madhineno ni otim nonro matut ewi jodito duto masani wach mibadhino kwako.
Bende omedo ni aputno dhichwalo dwoko mag nonro tok thwolo ma oktin ne ndalo 14. Moko kwom bengi makoro idhitimnegi nonro oting’o Kenya Commercial Bank (KCB), Standard Chartered Bank, Equity Bank, Diamond Trust Bank kaachiel kod Cooperative Bank of Kenya.
Omedo wacho ni jotich mag bengigo duto manotimo mibadhi makamaa okdhidong’ oko kata matin.
Bengino mar Standard Charted emanolal kod omenda mang’enyie mogik, omenda maromo Sh1.628 billion. Ekind omendago, omenda maromo Sh558.58 million nokaw kod jotich mag bengino mabende nokoso chiwo lipot makamaa ne duol marango lipode mag bengi kata Financial Reporting Centre (FRC) kalure kod chike mapachokaa.
Migosi Haji omedo wacho ni omenda maromo Sh886 million nokaw kod bengi mar Equity, Sh800 million nokaw kod mano mar KCB kasto maromo Sh27 million nokaw kod bengi mar Diamond Trust Bank.
